تختفى صورةوتظهر صورة

تختفى صورة
وتظهر صورة
وسبحان من له الدوام..
ويا ترى يا مصر إيه
اللى مخبياه الأيام..
...قوليلى من إيه يا حلاوة
وشك كده مخطوف..
عارف..
أول يا ابنى
ما اسمع حد بيقول
أيها الأخوة المواطنون
كلكم أهلى
وربنا يديم المعروف..
قلبى ينقبض
وأعرف إننا لسه
ف آخر آخر الصفوف..
بنصدق كتاب التربية القومية
ونحلم تغيرنا الظروف..
فوتك ف الكلام..
الشارع يا ابنى مدرسة
والزمن أكبر فيلسوف..
لكن على أد ما اتعلمت
م الدنيا
على أد ما أنا لسه جاهل
كنت كل ما أغلط
وأدق بالشاكوش
على صباعى
الأسطى بتاعى
يقوللى تستاهل
يا ترى كان بيفرح فيا
واللا كان عايزنى أتعلم..
آدينى لسه بتألم
ولسه بعور صباعى..

لــ على سلامة

Share انشر الموضوع على الفيس بوك