<1-- more -->وسط الميدان
واقف وقالع ملط وبيعلن بيان
وبأعلى صوت يصرخ
...
يموّت أى معنى للسكوت
مجنون وراضى بالجنان
والكل فيه بيبحلقوا
يبكوا عليه.. يتّريقوا.. هيهمه إيه؟
ف عنيه سيان..
معرفشى ليه.. ما قدرتش أسخر منه
أو أبكى عليه.. تهت ف عنيه..
طول عمرى غاوى أقرا ف عيون البشر
واتأمل المشاوير..
شُفت فعنيه.. حكايات كتير متستّفة
شُفت الشوارع والبيوت والأرصفة
مجنون وراضى بالجنان
ما عرفش ليه ف عيونى بان
فرعون وماسك صولجان
واقف بيخطب فى الميدان
واقف بيلعن ف الجبان
واقف بيخبط ع البيبان
قال اللى نفسى أقوله من مليون سنة
حط الجميع ف الامتحان
من يومها ولقتنى أنا ما باقتش أنا
ويا ريتنى شفته من زمان
علّمنى لكن بعد ما مرّت سنين
إن اللى عاش العمر بالعقل الرزين
هو اللى كان غلبان
عاش السنين مش دارى إنه كان سجين
والعقل كان سجّان!!
لـــ أسامه عبد الصبور
شاعر مصرى
