قهوة مسكرة زيادة

قهوة مسكرة زيادة
وقهوة وشها سادة
وأحلام طايرة ف العالي
وأحلام فارشة سجادة
واحلام سعرها غالي
واحلام لسه متعادة
وناس بتحب وتصارح
وناس بتحب وتخبي
وناس بتحب وتصالح
وناس بتشيل وبتعبي
ودنيا كلها مصالح
وماسكة عصاية بتربي
وناس عايشة تدايق ناس
باسم الحب والأحساس
وتتحكم ف ايامهم
وتتحكم ف احلامهم
وتتحكم ف اتمانهم
وبتبدل دهب بنحاس
وناس عايشة تداري الجرح
تقضيها ف جمع وطرح
وعايشة وراضية بقليلها
وعايشة وحاضنة منديلها
وناس الظلم بهدلها
وتستني ف حبة فرح
وريحة قهوة عربية
وصوت أغنية خليجية
عباية وشال
و راحة البال
وعمة وتوكة وكوفية
و واحد قهوة ع الريحة
وهعمل أي تسريحة
ولُقمة راح تسد الجوع
وهنزل أركب المشروع
أو هركب حمار شيحة
ومين حاسب علي المشاريب
دا ربك بكرة فرجوا قريب
هتتعدل بإذن الله
دي مرة تخيب ومرة تصيب

Share انشر الموضوع على الفيس بوك