إعلان عن بيع الطول والعرض
وحيطان البيت وتراب الأرض
إعلان عن بيع الروح والجسم
.وكل حروف الإسم
إعلان عن بيع كل الأحلام والأفكار
...وكل سنين المشوار
وبيع الأفراح والأحزان
إعلان عن بيع الضحكة الصافية ..والضحكة المقهورة
وبيع النفس المكسورة
وبيع البرواز والصورة ..وكل الألوان
إعلان عن بيع الأهل وكل الأصحاب
والقلب –ولو لسه جواه أحباب-
وبيع العمر الكداب ..
والعود الدبلان
وهابيع الشعر وكل الورق المكتوب
وكمان القلم المغلوب
وهابيع القدر المكتوب
إعلان عن بيع كل الممكن ..
وكل اللى مش ف الإمكان
إعلان عن بيع إنسان
يعلن هذا المعلن ..
عن بيع كل فصول الشتا والصيف
وربيع العمر ..وخريفه ..وتخريفه
وأى كلام كان من تأليفه
يعلن عن بيع قلمه والورقه
وكل الكتب اللى شايلها ف الشنطة
وبيع تذكرة القطر
وبيع الشنطة
إعلان عن بيع الإنسان صاحب هذا الإعلان
ولإن المعلن مش عارف ..
هو هايسوى كام !!
ولإنه بيبيع إنسان
ف زمان .. أرخص حاجة فيه الإنسان
هايكون البيع بالمجان
يعنى اللى هايختار هايشيل
ولا يمكن ولا ينفع يرجع
أصل أنا ويـّــا الإنسان .. هابيع العنوان
وهابيع اليافطة اللى عليها الإعلان
فيا كل اللى بتبصوا ف عنيا
إقروا الإعلان
لـــ شادى زلط
ضربة شمس
