الدم سال

الدم سال
غَطي الرصيف
غَطي الشوارع
فَرش المدينة
من الكنايس
...للجوامع
مش فارقة
هو دم مين
مسلم
مسيحي
مش فارقة
صرخة مين
أنا دلوقتي
سامع
الدم سال
غطي القلوب
غطي الشفايف و الدروب
غطي الحجر غطي الشجر
من الشِمال حتي الجنوب
الدم سال
من شب عابر ف الطريق
الدم سال
من طفل ذنبه أنه برئ
الدم سال
مين اللي هيطفي الحريق؟
الدم سال
عمال بيسأل ميت سؤال
يا مؤمنين
يا موحدين
دا يرضي مين
أنك تكون
راسك هنا
و أيدك هنا
ورجلك هنا
الدم سال عمال بيسأل ميت سؤال
الأمن فين
دا ف أي شرع وأي دين
نشكي لمين
مش دي بلدنا
مش دا شرفنا وعرضنا
مش مصر هي أمنا
الدم سال عمال بيسأل ميت سؤال
هتروحوا فين من ربنا؟

Share انشر الموضوع على الفيس بوك