الحالة الأولى ...

الحالة الأولى..
اتخضينا..
الحالة التانية..
غسلنا إدينا..
والحالة التالتة والستين
...كنا نسينا
من كتر الهم..

الجريمة الأولى..
اندهشنا..
الجريمة التانية..
اترعبنا..
والجريمة التالتة والستين
كنا خلاص اتعودنا
على شكل الدم..

السرقة الأولى..
اتلخبطنا..
السرقة التانية..
عيّطنا..
والسرقة التالتة والستين
كنا فقدنا الوعى
ومش عارفين
مين بالظبط اللى خبطنا..
وبقت أمانينا
بس نلاقى
رغيف العيش والمم..

الضربة الأولى..
استغربنا..
الضربة التانية..
اتغربنا..
والضربة التالتة والستين
من كتر الضرب
بقينا خلاص مش عايزين
نعرف مين اللى ضربنا
يا عم دماغك بقى..
يا عم...

من أشعار علي سلامة

Share انشر الموضوع على الفيس بوك